ЕУ ќе мора да ја искористи 2026 година за брзо да се движи кон амбициозно вклучување на Западен Балкан и Источна Европа или нема да има време да го стори тоа до крајот на мандатот на сегашната Комисија, изјави европската комесарка за проширување Марта Кос.
Кос разговараше со бриселскиот портал „Политико“ пред празниците за годината што завршува и нејзините очекувања за следната година.
„Ќе биде подобра (2026) од 2025 година“, рече Кос, инсистирајќи дека „дури и 2025 година беше многу успешна“.
Таа, исто така, рече дека ќе биде потребна акција во следните 12 месеци за да се обезбеди прием на нови членки на време.
„Зошто мислам така? Прво, тоа е геополитика. Второ, тоа е вистински ангажман од страна на некои земји-кандидатки“, изјави Кос за „Политико“.
Еврокомесарката, исто така, рече дека не станува збор само за кандидатите, туку и за ЕУ - дали може да се справи со предизвиците.
„Дали е добро за нашата безбедност… дали ги пополнуваме празнините што ги оставивме во минатото? Да! Дали ни треба Украина во ЕУ? Да!“, нагласи Марта Кос.
Како што рече словенечката еврокомесарка, до крајот на следната година ЕУ „сè уште нема да биде поголема“, но „ќе бидеме поблиску“ до целта за проширување.
„Веројатно ќе ги завршиме сите преговори со Црна Гора дотогаш“, рече Кос.
Црногорскиот претседател Јаков Милатовиќ изјави за „Политико“ дека напредокот на Црна Гора кон пристапувањето во ЕУ мора да се постигне во следната година, ако тоа треба да се постигне во рамките на мандатот на оваа Европска комисија.
Милатовиќ рече дека е оптимист дека за време на шестмесечното кипарско претседателство со ЕУ од 1 јануари, ќе се формира работна група под покровителство на Советот за изготвување на договорот за пристапување на Црна Гора.
„Ова е навистина голем чекор. Тоа сигурно ќе значи дека Црна Гора ќе стане 28-ма членка на ЕУ во 2028 година“, рече црногорскиот претседател.