Европската комисија (ЕК) разгледува модели што би ѝ овозможиле на Украина брзо да се приклучи на Европската Унија (ЕУ) како дел од мировниот договор со Русија, но без сите права што ги подразбира членството, а кои Киев постепено би ги стекнал за време на транзициските периоди, изјавиле за „Ројтерс“ претставници на ЕУ.
Според нив, идејата е сè уште во рана фаза и замислена е како можен гест кон Украинците, кои го гледаат членството во ЕУ како клучна безбедносна гаранција по војната и бараат убедлив сигнал дека се на патот кон економска стабилност и интеграција со Западот.
Дипломатите рекоа дека членството на Украина во ЕУ до 2027 година е споменато во нацрт-мировниот план што го дискутираат САД, Украина и ЕУ, но дека многу членови сметаат дека таков рок е нереален, со оглед на тоа што процесот на пристапување се базира на исполнување на критериумите и бара согласност од сите 27 земји-членки и нивните парламенти.
Според предлогот што го разгледува Комисијата, вообичаениот процес делумно би се променил – Украина брзо би станала членка на ЕУ, но постепено би добила право на глас и други целосни права, во зависност од напредокот во усогласувањето со правото на ЕУ.
Фото: Insight EU Monitoring
„Мораме да признаеме дека реалноста денес е различна од кога правилата за проширување беа првично утврдени“, изјавил функционер на ЕУ, додавајќи дека таков модел би можел да се примени и на други кандидати.
Службениците истакнуваат дека Украина, за разлика од другите земји кандидати, нема луксуз на долгорочен процес, бидејќи евентуалниот мировен договор би можел да вклучува територијални отстапки и да биде тешко прифатен за јавноста.
„Во интерес на Европа е Украина да биде во ЕУ за сопствена безбедност“, порача друг дипломат, додавајќи дека треба да се најдат „креативни решенија“ за брзо политичко вклучување на Украина, со полноправно членство откако ќе бидат исполнети сите услови.
Дипломатите признаваат дека таков модел би бил тежок за прифаќање од сите земји-членки и би можел да покрене прашања за рамноправност со земјите што поминале низ, или сè уште поминуваат низ, традиционалниот процес на пристапување.