„Премиерот не планира разговори со претседателот Путин. Неговата цел е јасно да ја поддржи Украина во постигнување праведен и траен мир и да ја постави земјата во најсилна можна позиција за продолжување на борбата и за чекори кон мировни преговори“, им изјави портпаролот на новинарите, пренесува Index.hr.
Тој додаде дека рускиот претседател „досега не покажал никакви знаци“ дека сака да ја заврши војната во Украина. Воедно нагласи дека британската влада има „редовен“ контакт со руската влада, особено преку својата амбасада во Москва.
Кремљ пофали дел од европските земји
Кремљ претходно денеска оцени како „позитивно“ тоа што некои европски земји изразиле подготвеност да го обноват дијалогот прекинат по почетокот на рускиот напад врз Украина во 2022 година. Портпаролот на Путин, Дмитриј Песков, истовремено го критикуваше ставот на Обединетото Кралство, велејќи дека „засега останува на радикални позиции“ и „не сака да придонесе за воспоставување мир“.
„Позицијата на Лондон е од деструктивна природа“, изјави Песков.
Италијанската премиерка Џорџа Мелони на почетокот на јануари изјави дека „дошло време и Европа да разговара со Русија“, залагајќи се за европски „специјален пратеник“ кој би им овозможил да зборуваат со еден глас.
Што рекоа Макрон и Мерц?
Францускиот претседател Емануел Макрон во декември 2025 година порача дека за Европејците би било „корисно повторно да разговараат со Владимир Путин“ во рамките на „сеопфатен дијалог со Русија“, додека германскиот канцелар Фридрих Мерц во средата потврди дека „пронаоѓањето долгорочна рамнотежа со Русија“ би ѝ овозможило на Европската унија „со поголема доверба да гледа во иднината“.
Бидејќи американскиот претседател Доналд Трамп го обнови контактот со рускиот колега, поддржувачите на обновување на дијалогот тврдат дека Европа, доколку остане настрана, ризикува да биде само преговарачки адут во можната политичка разврска на војната во Украина, а пошироко и во обновата на американско-руските односи.