Министерството за одбрана на Словенија потврдило дека двајца офицери од словенечката армија отпатувале за Гренланд. Тие таму ќе учествуваат во меѓународната воена вежба „Арктичка отпорност“, која се одржува под водство на Данска, во време кога барањата на претседателот Доналд Трамп за припојување на островот кон САД стануваат сè поостри.
Тамошното Министерство за одбрана потврдило за „N1 Ljubljana“ дека припадници на Словенечката армија утрово заминале за Гренланд, каде што треба да пристигнат утре. Како што претходно објавуваат словенечките медиуми, офицер од Командата на силите и подофицер од Единицата за специјални операции отпатувале за арктичкиот остров.
Се потсетува дека на седницата на 17 јануари, Владата на Словенија одобрила распоредување на припадници на тамошната Војска на Гренланд. Министерот за одбрана на Словенија, Борут Сајовиќ во средата објави дека тие заминуваат овој викенд, објаснувајќи дека ќе останат на Гренланд неколку дена во првата фаза, додека понатамошни одлуки ќе се донесат според потребите. Ќе следат можни ротации, замени, засилувања и прераспределби.
Припадниците на Словенечката војска ќе учествуваат во планирањето и спроведувањето на меѓународната воена вежба „Арктичка отпорност“, која се одржува под водство на Данска и која, на прв поглед, е јасна европска мерка за одвраќање од заканите на американскиот претседател Доналд Трамп, кој изјави дека САД ќе го присвојат Гренланд „со милост или со сила“.