Сергеј Лавров остро ги нападна француските обиди за оживување на дијалогот меѓу Париз и Москва, нарекувајќи ги „патетични“, објави POLITICO.
„Францускиот претседател Емануел Макрон повторно рече пред околу две недели дека некако ќе му се јави на Владимир Путин“, рече Лавров во интервју за рускиот државен медиум RT. „Знаете, ова не е сериозно. Ова е патетична дипломатија. Ако сакате да се јавите и да водите сериозен разговор, тогаш јавете се. Путин секогаш ќе се јави на телефон. Тој секогаш ќе ги слуша сите предлози, особено сериозните“, рече Лавров.
Според двајца дипломати од Европската Унија, кои разговараа со POLITICO под услов на анонимност поради чувствителноста на темата, советникот на Макрон, Емануел Бон, бил во Москва во вторникот за да подготви терен за евентуално продолжување на директната комуникација меѓу Владимир Путин и Емануел Макрон. Двајцата лидери не разговарале директно од периодот веднаш по руската инвазија на Украина во 2022 година.
Фото: Фејсбук/Принтскрин
Друг дипломат споделил дека Бон се сретнал со Јуриј Ушаков, долгогодишен помошник на Путин и член на руската делегација во тековните мировни преговори со Украина, посредувани од САД.
Француските претставници одбија да ја потврдат или негираат посетата на Бон. Истото го стори и портпаролот на Кремљ, Дмитриј Песков, кој на редовната прес-конференција рече дека го прави тоа од „солидарност“ со француската страна.
Макрон во вторникот изјави дека се во тек „технички разговори“ за повторно воспоставување дијалог со Кремљ, додека неговиот кабинет еден ден подоцна соопшти дека овие контакти се водат транспарентно „и во консултација со претседателот Зеленски и со нашите главни европски партнери“.
Францускиот претседател долго време изјавува дека Европејците мора да водат свои, директни разговори со Москва, особено додека преговорите меѓу Русија, Украина и САД се одолговлекуваат, а војната влегува во својата петта година.
Руската политичка аналитичарка Татјана Становаја на социјалната мрежа X оцени дека реакцијата на Кремљ сугерира дека Москва во принцип остава простор за пристапот на Макрон, „но останува длабоко скептична кон она што Европа може да го понуди“.