Економскиот институт „Ифо“ ја ревидираше својата прогноза за намалување на населението на Германија за 1% до 2050 година на пад од речиси 5%, што би ја оставило земјата со најмало население од нејзиното повторно обединување во 1990 година, објави Фајненшл тајмс. Ревизијата се базира на ажурирани податоци од статистичкиот завод на земјата.
„Демографските промени ќе имаат значително влијание врз сите области на економијата и општеството“, предупреди економистот на „Ифо“, Јоаким Рагниц, во студијата.
Стапката на економски раст на Германија, за која се очекува да се движи околу само 0,4% на долг рок, веројатно ќе се соочи со дополнителен притисок бидејќи пазарот на трудот е погоден од демографски пад. Според „Ифо“, се очекува бројот на лица на возраст од 20 до 66 години да се намали за околу 12%, додека бројот на пензионери се очекува да се зголеми за повеќе од 20%.
Германскиот пензиски систем, кој е „плати по употреба“ (пензиски модел во кој придонесите од сегашните работници директно ги финансираат пензиите на сегашните пензионери), веројатно ќе биде под зголемен притисок. Владата веќе издвојува околу една четвртина од својот буџет за негова поддршка, а Федералната канцеларија за ревизија предупреди во 2024 година дека овој удел ќе се зголеми уште повеќе.
Рагниц ги повика политичарите итно да го земат во предвид „забрзаното намалување и стареење на населението“, особено во здравството и долгорочната нега.
До 2050 година, населението на Германија ќе се намали за повеќе од 4 милиони на околу 79 милиони, што е најниско ниво од почетокот на 1990-тите. Очекуваното намалување е поизразено бидејќи постарите проекции се базираа на погрешно високи проценки за сегашното население на Германија, кое заводот за статистика сега го проценува на 83 милиони во 2025 година, во споредба со 85 милиони претходно.
Во исто време, се очекува приливот на мигранти до 2030 година да биде значително помал од претходно проектираниот откако владата ја заостри политиката за миграција. Стапката на наталитет беше преценета и во претходните проекции, при што новите податоци покажуваат 150.000 помалку раѓања до 2030 година отколку што се очекуваше претходно.
Според институтот „Ифо“, Германија привлекла само 225.000 нето мигранти во 2025 година, во споредба со 454.000 во претходната проценка. Се очекува овој број да се зголеми на 250.000 годишно во следните пет децении.
Источна Германија ќе го сноси товарот на падот, додека ефектот ќе биде помалку изразен во поголемите урбани центри подалеку на запад, се вели во студијата на „Ифо“.