Синоќа на Политехничкиот факултет на Аристотеловиот универзитет во Солун беше спроведена полициска операција, во која беа приведени вкупно 38 лица, објави грчката државна телевизија ЕРТ.
Операцијата се одржа по полноќ во и околу факултетот, а нејзината цел беше да се следи спроведувањето на наредбата на ректорот, со која се забрануваат настани од неакадемска и научна природа на универзитетот по 22 часот локално време. Наредбата беше поттикната од неодамнешните немири во и околу образовната институција, предизвикани од анархисти.
Вкупно 48 лица беа однесени во полициската станица за време на синоќешната операција, од кои 38 беа приведени таму.
Толпата првично се собра за проекција на филм на факултетот, но по проекцијата, дел од гледачите останаа во зградата.
Во ноќта помеѓу 6 и 7 февруари, анархистите фрлија молотови коктели врз екипа на полицијата за немири во близина на Солунскиот универзитет. Следеа судири со употреба на солзавец, шок бомби и водни топови, при што беа повредени еден полицаец и една млада жена, а беа оштетени и паркирани автомобили.