Според најновите информации објавени од Ројтерс, креаторите на најпознатиот чет-бот во светот сега се во преговори за имплементација на нивната технологија во НАТО системите.
Иако првичните извештаи сугерираа дека вештачката интелигенција ќе управува со најстрого чуваните тајни, компанијата разјасни: фокусот во моментов е на некласифицирани мрежи.
Целта на оваа соработка е дигитална трансформација на застарените коалициски мрежи. Алатките за вештачка интелигенција треба да го забрзаат протокот на информации, да ги автоматизираат административните процеси и да помогнат во анализата на огромни количини на податоци кои не се класифицирани како строго доверливи документи.
Извршниот директор на компанијата, Сем Алтман, им призна на вработените на интерен состанок дека овие потези предизвикале „краткорочни потреси“ во угледот на компанијата. Сепак, тој цврсто стои зад одлуката „OpenAI“ да стане клучен технолошки партнер за западните одбранбени структури.
„Ова е пример за одлука што носи екстремен јавен притисок, но веруваме дека е стратешки исправна за иднината“, рече Алтман, алудирајќи на неодамна потпишаниот договор со Министерството за војна на САД.
Интересно е што овој пробив на „OpenAI“ доаѓа откако Пентагон ги прекина врските со нивниот главен конкурент, „Anthropic“. Според новата американска администрација, приоритет им е даден на домашните технолошки гиганти кои можат да осигураат доминација во глобалната трка со ВИ.
Иако многу критичари предупредуваат на етичките ризици од таквата одлука, „OpenAI“ уверува дека нивната технологија нема да се користи за развој на автономни оружја или системи кои убиваат без човечки надзор.