Клиничката болница „Аџибадем Систина“ по четврти пат ја доби акредитацијата од Joint Commission International (JCI), најпрестижната светска организација за акредитирање на здравствени установи според највисоките стандарди за квалитет и безбедност на пациентите.
Со оваа четврта акредитација, болницата уште еднаш го потврдува својот континуитет во одржувањето и унапредувањето на врвните стандарди во здравствената грижа. Ревизијата на болницата се одржа во периодот од 23 до 26 февруари и беше спроведена од страна на меѓународен тим експерти на организацијата Joint Commission International, при што беа детално евалуирани сите клинички и административни процеси, организациски структури, услуги и процедури поврзани со безбедноста и третманот на пациентите.
По завршената контрола, ревизорите беа едногласни во ставот дека Клиничката болница „Аџибадем Систина“ овозможува беспрекорна грижа за пациентите во согласност со светските протоколи и стандарди и има воспоставено функционален систем што овозможува пациентите да се чувствуваат безбедно.
„Континуитетот во одржувањето и унапредувањето на квалитетот на грижата за пациентите е најголемата потврда за сериозноста на една здравствена институција. Токму затоа сме горди што успеавме да изградиме институција која не само што ги достигнува, туку и низ годините ги одржува највисоките меѓународни стандарди за безбедност и квалитет. Тоа е доказ дека болницата има изградено стабилен систем во кој пациентите се згрижени идентично како и во другите светски болници, почитувајќи ги истите протоколи и упатства што се применуваат во најпрестижните здравствени центри“, изјави д-р Емилија Мирчевска, медицински директор.
ИМПЛЕМЕНТАЦИЈАТА НА JCI–СТАНДАРДИТЕ Е ГАРАНЦИЈА ЗА БЕЗБЕДНОСТ И ГРИЖА
Примената на JCI-стандардите подразбира воспоставување јасни, мерливи и строго контролирани процеси во секој сегмент од работењето. Тие се темелат врз интернационалните цели за безбедност на пациентите, кои вклучуваат: прецизна идентификација на пациентот, ефективна и структурирана комуникација, зголемена безбедност при употреба на високоризични лекови, сигурни и безбедни хируршки процедури, превенција и контрола на интрахоспитални инфекции, како и намалување на ризикот од повреди при болнички престој.
Во „Аџибадем Систина“ овие стандарди се целосно имплементирани и интегрирани во секојдневната практика. Болницата располага со над 3 500 пишани процедури, протоколи и формулари, кои задолжително се применуваат и редовно се ревидираат и унапредуваат.
„АЏИБАДЕМ СИСТИНА“ Е ПРВАТА БОЛНИЦА ВО РЕГИОНОТ СО ОВАА ПРЕСТИЖНА АКРЕДИТАЦИЈА
Со првата акредитација во 2016 година, Клиничката болница „Аџибадем Систина“ се запиша на мапата на акредитирани болници на Joint Commission International (JCI) и стана прва здравствена институција во земјава која работи во согласност со високите стандарди за безбедност и квалитет. Од првата акредитација до денес, болницата континуирано инвестира во унапредување на клиничките процеси, едукација на кадарот и развој на целосно интегриран здравствен систем, кој поставува високи критериуми во здравствената грижа според светски стандарди.