Јапонскиот град Гифу во својата прегратка крие кафуле во чија фасада е отсликан целиот урбан кварт. Кафулето дизајнирано од јапонските архитекти „Bandesign“ е целосно изведено од огледала, во кои се одразува целиот пејзаж и урбано опкружување. Сликата на фасадата се менува како што се менуваат и годишните времиња, давајќи еден постојано променлив изглед на зградата.
Инспирацијата за изгледот на проектот именуван „Mirrors“ доаѓа од природата околу кафулето, односно дрворедот од црешови дрва кои се точно спроти кафулето. Во периодот кога се расцветани, со своите нежни, розови цветови на фасадата се создава волшебна слика која потсетува на насликано уметничко ремек-дело, креирајќи дополнителна атракција за големиот број посетители кои доаѓаат за дрворедот за време на сезоната на цутење на црешите.
„Со цел да се мултиплицираат црешите, поставивме два ѕида од огледало под агол и на тој начин се создава ефект на шума од црешови дрва на аголот од улицата во градот. Освен надворешните посетители, кои се примамени во шумата од цреши, и гостите во кафулето може да ги гледаат и црешовите дрвја и нивниот одраз во огледалата и на тој начин да почувствуваат директно како се менуваат годишните времиња“, велат од „Bandesign“ во објаснувањето за Design.mk.
Со идејата да се запази приказната за шумата, во ентериерот на кафулето се користат бои кои би потсетувале на природата во шумата, влезната врата е бојадисана во црвено, а внатрешниот ѕид е комбинација од црвено и од зелено.
