Со текот на времето, витражот станал главен елемент во црквите, храмовите и во манастирите, а потоа навлезе и во домовите, каде што се користи наместо обичното транспарентно стакло за прозорците и за вратите. Постојат две техники на изработка на витражот, класичната со користење оловни профили и „Тифани“ техниката, каде што парчињата стакло се спојуваат со бакарна фолија и потоа се соединуваат со калај.
Иако курсевите за изучување на техниките за професионална изработка на витраж се сè почести, некогаш средствата и времето нè попречуваат во тоа. Имајќи го тоа на ум, ќе ви претставиме интересен „Направи сам“ проект за кој не се потребни специјалните техники, туку само малку креативност. За изработката на витраж за прозорецот или за вратата во домот ќе ви биде потребно:– парче стакло со потребните димензии во зависност од тоа дали ќе го поставите на прозорец или на врата;
– лепливи ленти;
– различни бои за стакло;
– четки за боење;
– хартија со исти димензии на стаклото;
– маркер;
– скалпел или ножици;
– линијар.
Најпрво земете ја хартијата и на неа со маркерот исцртајте шаблон со форми по желба. Може да креирате геометриски форми со помош на линијарот за попрецизни линии или, пак, да импровизирате и да создадете креативна слика или облици.
Потоа ставете го парчето стакло на хартијата врз формите што ги направивте со маркерот. Следејќи ги линиите на шаблонот, излепете го стаклото со лентите, кои ќе внимавате да ги исечете прецизно, со цел беспрекорно да се спојат една со друга.
Следниот и најважен чекор во проектот е боењето на обележените форми на стаклото. Прво внимателно поминете со четката по рабовите на обележените делови и потоа пополнете ја внатрешноста. Доколку при боењето се направат меурчиња, употребете игла за да ги пукнете.
