Веднаш по одржување на мирниот протест на Наставнички пленум пред Министерство за образование и наука (МОН) , администраторите на профилот на Фејсбук на Наставнички пленум забележале дека не може да се вклучат преку него. Причина за тоа е што профилот бил пријавен за лажен и администраторите на Фејсбук го блокирале/повлекле, објави Фактор.мк.
Професорката Жана Живадиновиќ, активистка на Наставничкиот пленум и членка на СОНК, за Фактор вели дека не може да верува дека „некому толку многу можел да му пречи овој профил за да повика на масовно пријавување на профилот за лажен“.
– Доколку некој можеби си помислил дека преку згаснување на профилот ќе згасне и нашата активност, тоа би било навистина смешно и површно размислување. Пред неколку часа успеавме повторно да го вратиме профилот бидејќи преку него ги објавуваме активностите на пленумот. Меѓутоа профилот не е единствената алатка која ни служи за комуникација со јавноста. Сите заинтересирани можат да ги следат нашите активности, ставови, аргументации и мислења на нашиот блог https://nastavnickiplenum.wordpress.com/ или на ФБ групата на НП https://www.facebook.com/nastavnickiplenum и притоа можат и самите активно да се вклучат со коментари – вели Живадиновиќ.