За рекордни 28,25 милиони швајцарски франци во вторникот вечерта во Женева беше продаден мианмарски рубин. На аукцијата на аукциската куќа “Сотби” (Sotheby`s) интересот за обоените камења беше многу голем, посочуваат експертите.
Рубинот Sunrise Ruby, обоен во жива црвена боја, нарекуван од специјалистите “гулабова крв“ е монтиран на прстен, изработен од куќата за накит ” Картие “.
Платената сума, според “Сотби” е рекордна и за рубинот, и за скапоцениот камен на “Картие”, продадени на аукција.
Рекордот е регистриран и за обоениот скапоцен камен, различен од дијамант. Пред аукцијата Експертите го оценуваат Sunrise Ruby меѓу 11 и 17,5 милиони долари.
На истата аукција беше продаден и розов дијамант со тежина 8,72 карати за 14,8 милиони франци. Се смета дека дијамантот Historique Diamant Rose, бил дел од колекцијата на Матилда Бонапарта – внука на император Наполеон I. Од 1940 година дијамантот се чуваше во банка и не беше многу познат.
За 6,5 милиони франци беше продаден и ѓердан од 78 бисери. Според “Сотби” и оваа цена е рекордно висока за овој вид производи, продадени на аукција.
На аукцијата во вторникот вечерта беа продадени украси за близу 147 милиони швајцарски франци.