Министрите за надворешни работи на земјите членки на НАТО би требало во среда да ја поканат Црна Гора да се придружи на Алијансата, дознава во понеделник агенцијата France presse од дипломатски извори.
„Планот на декларацијата го одобри Советот на НАТО на ниво на амбасадори“, рече еден дипломат за AFP.
Официјалната одлука ќе ја донесат 28 министри за надворешни работи на земјите членки на НАТО, а кои би требало да ја поканат Црна Гора да се приклучи на НАТО во среда, на вториот ден од министерскиот состанок во Брисел.
Пристапот ќе се одвива во максимален период од година и половина, појасни дипломатскиот извор, по фазата на преговори и ратификација во националните парламенти на 28 земји членки.
„Тоа ќе биде историска одлука што ќе го одбележи нашиот постојан ангажман во полза на земјите од западен Балкан и нашата политика на отворена врата“, коментираше во понеделник генералниот секретар на Сојузот Јенс Столтенберг, кој сепак не се изјасни за одлуката.
„Црна Гора помина добар дел од пристапниот пат до евроатланското семејство“, оцени Столтенберг.