Четири нови хемиски елементи беа официјално додадени кон Менделеевaта таблица со што се пополни целосно нејзиниот седми ред, објави ББС.
Ова се првите елементи кои влегуваат во табелата од 2011 година, кога таму место најдоа елементите број 114 и 116. Новите засилувања на табелата беа потврдени од страна на Меѓународната унија на теоретската и применета хемија (МСТПХ) уште на 30 декември минатата година, но сега официјално најдоа место во табелата.
Од МСТПХ објавија дека тим од руски и американски научници ги обезбедиле потребните докази за постоење на елементите 115, 117 и 118. За откривањето на елементот 113 заслуга има јапонски тим кон институтот “Рикен”. Истражувачите на новите елементи ќе имаат задача да им дадат имиња и хемиски симболи.
“Хемиската заедница нема трпение да ја види најценетата хемиска табела исполнета до крајот на седмиот ред. МСТПХ почна процес по формалното давање на имиња и симболи на овие елементи “, рече професор Јан Реедик, претседател на одделот за неорганска хемија во меѓународната организација. Новите елементи можат да бидат крстени по митски суштества, минерали, места, држави и друго. Откако дадениот оддел кон МСТПХ ќе ги прифати новите имиња и двубуквени симболи, тие ќе подлежат на петмесечна јавна расправа. Потоа советот на хемиската организација ќе ја донесе својата конечна одлука.