Република Македонија е нераскинливо поврзана со НАТО и има целосна поддршка од Соединетите Американски Држави на патот кон полноправно членство во Алијансата, заклучија министерот за одбрана, Зоран Јолевски и заменик помошникот државен секретар на САД за Европа и Евроазија, Хојт Ји, на денешната средба во Министерството. На средбата министерот Јолевски побара поддршка од САД, како стратешки партнер, на претстојниот Самит на НАТО во Варшава.
Министерот Јолевски се фокусираше на досегашните развојни процеси и програми во Министерството и Армијата, кои, рече, докажуваат дека Македонија е подготвена за членство во НАТО. „Продолжуваме со реформите во одбраната, а започнува и процес на модернизација кој е исклучително важен за Армијата. Со модернизацијата АРМ ќе стане силна армија, гарант за територијалниот интегритет и суверенитет на Република Македонија, а воедно ќе стане целосно интероперативна со армиите на останатите членки на НАТО. Со модернизацијата ќе бидат исполните обврските од партнерските цели, кои се усогласени со НАТО“.
Работиме на постојано обучување и оспособување на припадниците на АРМ, со што ја одржуваме и унапредуваме интероперативноста со нашите партнери од НАТО“, додаде министерот.
Хојт Ји посочи дека САД ги препознава добрите практики во процесот на реформи на Армијата и на одбраната и дека земјата дава целосна и континуирана поддршка за членството на Македонија во Алијансата. Тој изрази исклучително задоволство од билатералната соработка во областа на одбраната, која, рече, е пример за соработка меѓу две пријателски земји, кои се стратешки партнери.
Разговарајќи за мигрантската криза која го зафати континентот, министерот го информираше соговорникот за ангажманот на Армијата на јужната граница. Притоа истакна дека е потребно Европската Унија, но и пошироката меѓународна заедница да усогласи сеопфатна стратегија за решение на конфликтот во Сирија и како да се справи со мигрантскиот бран.
Интегрален текст