“Епл” ја отвори својата прва продавница за Југоисточна Азија во Сингапур, собирајќи стотици возбудени фанови во објектот во луксузниот трговски реон на градот. 
Новиот магазин лесно се препознава по култната стаклена фасада и се очекува да биде еден од најпопуларните во светот, посочуваат од американскиот технолошки гигант.
Производи како “Ајфон” и “Мекбук” се поставени стратешки на пространиот прв кат, а на врвот се наоѓа и “училница”, во која клиентите можат да учествуваат во практични сесии.
Стотици се упатија кон зградата, набргу откако вратите се отворија, јави репортерот на АФП. Прв на опашката беше 25-годишен кинески државјанин кој работи во Макао и чекал пред влезот со часови од вечерта.
“Епл”, чие богатство се проценува на околу 256,8 милијарди долари, ја одбележа својата 40-годишнина лани. Повеќето од приходите доаѓаат од iPhone, кој се соочува со потешка конкуренција на заситениот пазар. Компанијата има околу 500 продавници во целиот свет со повеќе од 1 милион посетители дневно.