Велика Британија ќе се обиде да склучи договор за слободна трговија со Кина по „Брегзит“. Лондон верува дека може да има корист од зголемувањето на потрошувачите од средната класа и брзорастечкиот услужен сектор во втората по големина економија во светот.
„Кина е земја со која сакаме да склучиме трговска зделка“, рече премиерот Тереза Мај на пат кон Вухан – универзитетски град, каде што таа ќе објави образовни договори во вредност од 500 милиони фунти.
„Мислам дека во меѓувреме можеме да направиме повеќе … во однос на можните препреки во трговијата и отворањето на пазарите, за да се гарантира дека британските бизниси можат да прават добра трговија во Кина“, додаде таа.
Само 3,1% од британскиот извоз во 2016 година е насочен кон Кина, во споредба со 43% за Европската унија.
Пекинг и Лондон имаат желба за трговско партнерство, но официјалните разговори не можат да започнат пред Велика Британија официјално да ја напушти ЕУ следната година.
Велика Британија покажа на кинеските компании дека е целосно отворена за бизнис, кои веќе инвестираат во нуклеарната енергетика на Островот, а британски компании како „Rolls Royce“ добија големи нарачки од Пекинг.
Велика Британија беше првата западна држава која се приклучи на Азиската банка за инфраструктурни инвестиции, а министерот за финансии Филип Хамонд учествуваше на самитот во Пекинг, посветен на иницијативата „Еден појас, еден пат“, чија цел е преку огромни инвестиции да создаде нов „Пат на свилата“.
Меј и кинеските шефови на држави ја потврдија својата посветеност на „златното доба“ во нивниот однос. Британскиот премиер гледа голем потенцијал на новиот „Пат на свилата“, но верува дека проектот треба да биде направен на вистински начин. Кинеските производи веќе патуваат до Лондон по шините.
„Би сакала да видам гаранции дека ќе имаме транспарентност и согласност со меѓународните стандарди и ќе разговараме за ова со моите кинески соговорници“, рече таа.
Меј ќе го покрене прашањето за иднината на Хонг Конг пред кинескиот претседател Си Џинпин, нагласувајќи ја посветеноста на Велика Британија кон правилото „една земја, два системи“ кон поранешната британска колонија.
Поранешниот гувернер на специјалниот административен регион, Крис Патен испрати писмо до Меј на почетокот на неделата со предупредување за „растечки закани за основните слободи, човекови права и автономија“ на територијата.
„Ние веруваме дека иднината на Хонг Конг за една земја, два системи е важна, ние сме посветени на тоа“, рече Меј. Таа потсети дека таа претходно разговарала за ова прашање со Си Џинпин и ќе продолжи да го прави тоа.