„Изминатиов период сум предмет на интересирање на опозицијата. Обвинувањата на ВМРО – ДПМНЕ се движат од тоа дека имам финансиска корист од преговорите околу разликата со името со Грција, до тоа дека сум влегол во политиката да ги вратам наводните долгови на компаниите кои ги поседувам. Сите овие обвинувања може да се објаснат со два збора – бескрупулозни лаги“, се вели во соопштението на Заменик претседателот на Владата задолжен за економски прашање Кочо Анџушев.
Ваквата реакција следува откако ВМРО ДПМНЕ го обвини за злоупотреба на позицијата, за сопствена корист.
„Сомнежите за злоупотребите на функцијата во повеќе инстанци не застануваа тука. Владата во ноември минатата година ја укина царината за литиум – јонски акумулатори само за производителите на машини и други производи што користат вакви батерии, но не и за трговците. Единствена фирма во Република Македонија која што користи вакви акумулатори е фирмата „Брако“, токму во сопственост токму на Кочо Анѓушев.
Граѓаните прашуваат дали Кочо Анѓушев со нивните пари од Буџетот на државата преку разни тендери и преку разни царински ослободувања ги враќа долговите кои ги имал пред да влезе во политиката?
Додека фирмите на Анѓушев нижат тендери и царински ослободувања, државата економски очигледно стагнира па дури оди надолу. Животот очигледно дојде само за фирмите блиски до врвот на власта. Државните средства не смеат и не треба да се користат за враќање на нечии долгови, “ рече Влатко Ѓорчев на прес конверенција.
Анџушев одговори на ваквите обвинувања, „Избрав да се обратам на овој начин, лично јас, бидејќи немам намера секој ден да се занимавам со луѓе кои немаат друга работа освен да држат прес конференции каде повикуваат да се даде одговор на непостоечки обвинувања.
На почеток на мандатот, во законски рок транспарентно го објавив имотниот лист и се гордеам со се што сум направил во Република Македонија. Јас немам што да кријам, но за жал луѓе кои се навикнати да живеат од рекет и криминал и воедно немаат друг аргумент за тоа како некој друг може да биде чесен и успешен на поинаков начин од нивниот, се занимаваат со лаги и во нивните глави замислени шеми.
Немам намера да влегувам во политичката шема на ВМРО – ДПМНЕ кои покажаа како не треба да се владее изминатите 10 години и искрено изненаден сум од неинвентивноста на прес конференциите на ВМРО – ДПМНЕ и нивното елементарното непознавање за економските текови.
Мојата работа изминатиот период покажува резултати, тие се видливи, а за се останато ВМРО – ДПМНЕ и нивните претставници кои ги изнесуваат секојдневно лагите ќе мора јавно да се извинат во рок од 24 часа за изнесените невистини или истото да го докажуваат пред судските инстанции во земјава каде ќе поведам постапки за навреда и клевета.“