Јапонија собрала речиси цело потребно количество злато и сребро од употребени електронски уреди, за да ги направи медалите за Олимпијадата во 2020 година, објави The Verge.
Пред две години стана јасно дека Јапонија има намера да ги изработи медалите за Летната Олимпијада, користејќи метали од рециклирана електроника. Во врска со оваа иницијатива, Организацискиот комитет на Игрите ги повика жителите да донираат стара и непотребна електроника.
Досега се собрани околу 47,5 тони електронски отпад. Ова вклучува повеќе од 5 милиони мобилни телефони кои ги предале корисниците во продавниците на NTT Docomo и на други места опремени со специјални контејнери.
Целта на Комисијата за собирање 2.700 килограми бронза беше постигната во јуни минатата година. Освен тоа, 93,7% од потребните 30,3 кг злато и 85,4% од потребните 4,1 тони сребро се добиени во октомври.
Очигледно, поставената цел ќе се постигне во блиска иднина. Програмата за собирање електроника ќе заврши на 31 март оваа година, а медалите ќе бидат прикажани во текот на летото.