Бугарија купува оклопни возила од европските земји

Бугарија побара понуди од четири европски земји за продажба на 150 оклопни возила, соопшти денеска Министерството за одбрана.

Бугарија, која стана членка на НАТО во 2004 година, распиша тендер вреден околу 836 милиони долари, обраќајќи им се на Германија, Финска, Франција и Швајцарија да испратат понуди, се наведува во соопштението.

Меѓу потенцијалните доставувачи се германскиот „Артек“, францускиот „Некстер“ и финската „Патрија“.

Софија бара од производителите да достават понуди до 31 октомври, а најповолната понуда ќе биде позната на 20 декември.

НАТО ги охрабрува своите источни членки да развиваат, купуваат и користат нова опрема од Алијансата.