Весникот Чајна Дејли објави денеска дека целта на стационирање кинески трупи во Хонг Конг не е симболична и дека тие нема да имаат причина да не реагираат доколку ситуацијата во градот се влоши.
Кина вчера заврши со рутинска ротација на воздушните, копнените и поморските сили во Хонг Конг, поранешна британска колонија каде што се одржуваат антивладини демонстрации од јуни.
Одредот војници на Народноослободителната армија е стациониран во Хонг Конг од 1997 година.
Според аналитичарите, гарнизонот има меѓу 8000 и 10.000 војници кои се во бази на југ во Кина и во низа касарни во Хонг Конг кој има статус на специјална административна област. „Иако владата во таа област досега не чувствуваше потреба да го повика гарнизонот, тоа не значи дека тоа нема да го направи ако затреба“, наведува весникот.