Косово го откажа присуството на регионалниот самит во Прага меѓу лидерите на Вишеградските држави и Западен Балкан во врска со изјавите на чешкиот претседател Милош Земан, пренесува АФП.
Чешкиот државен шеф, кој ја посети Србија претходно оваа недела, ги идентификуваше лидерите на Косово како „воени злосторници“. Земан додаде дека „земјите предводени од воените злосторници немаат место во заедницата на демократски држави“.
„Косово испрати дипломатска нота со извинување за отсуството, откако претходно го потврди своето учество“, рече портпаролката на владата во Прага, Јана Адамкова.
Во вторникот, медиумите објавија дека Земан го уверил српскиот претседател Александар Вучиќ за време на неговата посета на Белград дека му се допаѓа Србија и српскиот народ, но не го сака Косово. На заедничката прес-конференција, Земан истакна дека ќе ја разгледа можноста на Прага да го повлече признавањето на независноста на Косово.
Но, чешкиот министер за надворешни работи Томаш Петричек во средата изјави дека Прага нема интерес да ја откаже својата одлука од 2008 година да го признае Косово како независна држава.
„Го признавме Косово во 2008 година de jure и е во интерес на безбедноста и транспарентноста на нашата надворешна политика да не ја менуваме нашата одлука“, рече Петричек за АФП.
Во моментов се одржува состанок во Прага меѓу лидерите на земјите од Вишеградската група и Западен Балкан, чиј домаќин е премиерот на Чешка Андреј Бабиш. Ова е прва средба меѓу премиерите на Вишеградските четири (Чешка, Словачка, Унгарија и Полска) и нивните колеги од Западен Балкан. Средбата ќе се фокусира на зајакнување на целокупната политичка и економска соработка меѓу двата региона, со посебен фокус на инфраструктурата, образованието, финансиската стабилност и климатските промени.
Чешката Република, како ротирачки претседател на Вишеградската четворка, го идентификуваше како еден од нејзините приоритети за време на нејзиниот мандат пристапувањето на Западен Балкан во Европската унија.