Европските весници го отсликаа историското излегување на Велика Британија од ЕУ со тага, здрава доза скептицизам и повик Заедницата да дејствува обединето, пишува „Гардијан“.
„Крај“, пишува францускиот весник „Либерасион“. „Велика Британија ја напушти ЕУ, нема што многу да се каже. По 47 години во срцето на уникатниот клуб на земји, по три години и седум месеци драма, превирања и хаоси, Велика Британија сизамина, се врати на својот Остров, сама“, забележува изданието.
Весникот, исто така, напиша дека повеќето луѓе не гледаат ништо посебно, нормална вечер без многу прашања за тоа што е следно. „Брегзит“ и ефектите се само почеток. Утре е нов ден, по „Брегзит“, потенцира „Либерасион“.
„Монд“ напиша дека 31 јануари е „денот, во кој ништо не се смени и сè се промени“. Весникот раскажува за чуден ден во кој Британците славеле вистински историски настан. „Дали навистина може да се слави разводот“, пишува весникот.
Германски „Зидојче Цајтунг“ предупредува дека „ниту една земја не е Остров, ниту Велика Британија“. Суверенитетот е „популарен термин во ера што плаче за ред и безбедност. Но, да претпоставиме дека сте господар на вашата судбина, тогаш можете да се заштитите од неразумните барања од надворешниот свет. Убава идеја во свет, кој создаде огромни зависности. Песната е крај на вазалството и понижувањето, но Велика Британија нема големи идеи за својата иднина … засега, сите гледаме тесно негирање на реалноста и тривијалност на проблемите“, пишува весникот.
„Велт“ предупредува на ефектите од илузијата што ја потхранува „Брегзит“ за величината на Велика Британија, нагласувајќи дека многу ќе зависи од тоа „дали британските пост-брегзитни политики конечно можат да бидат фер според вистинската големина на земјата“. Весникот ги цитира предвидувањата на советникот и научник Хенри Тисард во 1949 година: „Ние не сме голема сила и никогаш нема да бидеме повторно. Ние сме голема земја, но ако продолжиме да дејствуваме како голема сила, наскоро ќе престанеме да бидеме голема земја“.
Шпански „Ел Паис“ предупредува дека премиерот Борис Џонсон сега се соочува со „колосален предизвик: да се врати единството на поделената земја меѓу оние кои го сметаат „Брегзит“ како ослободување и оние што ја гледаат како трагедија и историска грешка“. Весникот, исто така, пишува дека може да се продолжи уште една стара војна: меѓу застапниците за слободна трговија кои бараат тотална дерогација од правилата на ЕУ и оние кои ќе започнат да ги гледаат ефектите на „Брегзит“ врз земјоделците, рибарите и деловните активности во наредните месеци.
Во Холандија, „НРЦ Ханделсблад“ пишува дека ЕУ мора да продолжи напред.