Палестинскиот претседател Махмуд Абас вчера порача дека исламистичкото движење Хамас нема да може да управува со Појасот Газа во поствоениот период, повикувајќи дека таа групација мора да го остави оружјето и да ја прифати политичката програма на Палестинската ослободителна организација (PLO).
„Хамас мора да го предаде оружјето на Палестинската управа и да се вклучи во политичката работа во рамките на единствен правен систем – една власт, еден закон и едно легитимно оружје“, рече Абас при средбата во Аман, Јордан, со поранешниот британски премиер и поранешен специјален пратеник на блискоисточниот квартет, Тони Блер.
Изјавата доаѓа среде силните дипломатски напори да се постигне прекин на огнот во Газа, со преговори меѓу Хамас и Израел во Доха, Катар.
Палестинскиот претседател ја повтори потребата за запирање на непријателствата веднаш, ослободување на сите заложници и притвореници, како и непречен влез на хуманитарна помош во Појасот Газа.
Абас нагласува дека единствено одржливо решение е целосно израелско повлекување од Газа и оснажување на палестинската држава да преземе целосна контрола врз територијата, со силна арапска и меѓународна поддршка.