Најновиот декрет на владетелот на Абу Даби им дозволува на немуслиманите да го регулираат својот брачен статус поинаку од претходно, а од недела ќе можат да се венчаат, да се разведуваат и да имаат заедничко старателство над децата според одредбите на граѓанското право, објави агенцијата WAM.

Тоа е еден од последните потези на Обединетите Арапски Емирати, земја во која брачниот статус е регулиран според строгите шеријатски принципи, за одржување на конкурентноста како регионален трговски центар.

Според декретот на владетелот на Абу Даби, шеикот Калифа Зајед ал Нахаџан, кој е и претседател на федерацијата на седум емирати на ОАЕ, новиот закон ги опфаќа граѓанските бракови, разводот, алиментацијата, заедничкото старателство над децата, доказот за татковство и наследството.

Целта на законот е „да се зајакне позицијата и глобалната конкурентност на емиратот како една од најатрактивните дестинации за таленти и луѓе со вештини“, пренесува WAM.

Граѓанскиот закон за немуслиманите е прв од ваков вид во светот што е „во согласност со најдобрата меѓународна практика“. Во Абу Даби ќе се формира нов суд кој ќе се занимава со немуслимански семејни прашања, а сите прашања ќе се решаваат на арапски и англиски јазик.