Универзитетскиот професор Илија Ацески ја коментираше иницијативата на Министерството за образование и наука (МОН) за подготвување нови закони за образование. Тој во разговор со Локално.мк, ја истакна важноста на темелни реформи во образовниот систем и потребата од формирање независна и објективна комисија за оценување на дипломираните студенти.
“Треба да се почнат подлабоки реформи, особено во високото образование, каде што наставниците и училиштата треба да се фокусираат на студентите. Моменталниот систем го губи основниот контакт помеѓу професорите и студентите, а оценувањето често е формално, преку тестови и писмени работи кои студентите ги копираат од интернет.”
Ацески додаде дека во моменталниот систем недостига истражувачка и практична работа, а наставниците на сите нивоа имаат комфорен однос кон наставата. Според него, ова води до неквалитетно образование, каде што учениците и студентите не се активно вклучени.
“Во средното и високото образование, многу студенти добиваат високи оценки без да се соочат со реалните содржини. Ова резултира со неквалитетна настава и незаинтересираност од страна на студентите“, рече Ацески.
Професорот истакна дека отворањето на многу факултети и универзитети без задоволување на елементарни критериуми дополнително го влошило образованието. Тој предлага формирање на независна и некорумпирана комисија која би ги проверувала дипломираните студенти со цел да се подобри квалитетот на наставата.
“Министерството треба да се фокусира на проверка на квалитетот на кадрите, а не само на бројот на дипломирани студенти. Комисијата би требало да тестира дали студентите се подготвени за реалните работни задачи,” објасни Ацески.
На крајот, Ацески истакна дека квалитетното образование е клучно за иднината на Македонија и дека е потребно да се вложат напори за да се постигне тоа.