Познат ирански активист за човекови права се самоуби во знак на протест против, како што рече, диктатурата на врховниот лидер на Иран, ајатолахот Али Хамнеи.
Во објава на социјалните мрежи, Кијануш Санџари рече дека ќе се самоубие доколку четворица политички затвореници не бидат ослободени до седум часот во среда по локално време.
Неговата смрт беше потврдена неколку часа подоцна од колегите активисти.
Пред смртта тој објави дека сака „Иранците еден ден да се разбудат и да го надминат ропството“.
Санџари беше гласен критичар на иранските лидери и застапник на демократијата.
„Никој не треба да биде затворен затоа што го изразил своето мислење“, рече тој пред неговата смрт.
„Протестот е право на секој ирански граѓанин“.
Во средата наутро тој напиша: „Ако Фатима Сепехари, Насрин Шакрами, Тумаз Салехи и Аршам Резаи не бидат ослободени од затвор до 19 часот денеска, ќе ставам крај на сопствениот живот во знак на протест против диктатурата на Хамнеи и неговите партнери“. ”
Четворицата беа уапсени за поддршка и учество во бранот протести по смртта на 22-годишната Махса Амини, која почина во 2022 година откако беше приведена од иранската полиција за морал.
Санџари беше апсен и затворан неколку пати поради политички активизам во периодот од 1999 до 2007 година.
Тој го напушти Иран во 2007 година и доби азил во Норвешка, пред да се приклучи на персискиот сервис на американската телевизија „Глас на Америка“ во Вашингтон.
Се вратил во Иран во 2016 година за да биде со своите родители, а бил уапсен и осуден на 11 години во озлогласениот затвор Евин, каде често се носат политички затвореници.
Бил пуштен со кауција во 2019 година поради здравствени причини, а потоа однесен во психијатриска болница.
Санџари за локалните медиуми изјави дека бил подложен на струен удар, врзуван за кревет и му биле инјектирани супстанци.
„Кијануш Санџари не е само име, тоа е симбол на годините на болка, отпор и борба за слобода“, објави активистот за слобода на говор Хусеин Ронаги на социјалната мрежа Х.