Албанија денес го слави својот национален празник – Денот на независноста, објавува албанскиот новински портал „Шкиптарија“. Албанците од целиот свет го слават овој ден како еден од најважните моменти во историјата на земјата, а 28 ноември е прогласен за празник и во Косово.
На 28 ноември 1912 година, во Валона, Исмаил Кемали ја прогласил независноста на Албанија од Отоманската империја и станал прв премиер на земјата. На прогласувањето на независноста присуствувале 83 делегати од сите албански заедници, од кои 40 учествувале во потпишувањето на декларацијата за независност.
Празникот е познат и како Ден на знамето, бидејќи на 28 ноември 1443 година, албанскиот национален херој Георги Кастриоти – Скендербег го предводел отпорот против Отоманската империја со кревање на знамето со црн орел на црвена позадина во Круја – симболот на семејството Кастриоти и денешното албанско национално знаме, потсетуваат медиумите.
Планирани се голем број активности за одбележување на денешната 113-годишнина од прогласувањето на независноста на земјата.
Во југозападниот албански град Валона, каде што беше прогласена независноста, утрово ќе се одржи официјална церемонија за кревање на албанското знаме, по што ќе му се оддадат почести на Исмаил Кемали на неговиот гроб во центарот на градот. Во рамките на празникот, таму ќе се одржат и парада, изложби, саем, фолклорни претстави, младински и симфониски концерт, а вечерта ќе се одржи голем празничен концерт.
Во главниот град Тирана се очекуваат и голем број настани за одбележување на празникот – почит кон националното знаме и фестивал на албанските традиции, каде што ќе бидат достапни за дегустација на албански јадења, а гостите ќе можат да уживаат во фолклорни претстави и музика во живо.
Празникот ќе вклучува и настап на фолклорниот ансамбл од Тирана и посебен концерт за деца во зоолошката градина во главниот град на Албанија.
Во пресрет на националниот празник, беше организирана официјална вечера околу голема тркалезна маса во центарот на северозападниот албански град Скадар, објави АТА.
На официјалната вечера, наречена „Маса за независност“, присуствуваа косовскиот претседател Вјоса Османи и министерката за надворешни работи на Албанија, Елиса Спиропали.
„Масата за независност“ ја симболизира древната традиција на гостопримство што ги обединува Албанците, забележа АТА.
На небото над Скадар имаше и шоу од дронови, кои ги формираа натписите „Добредојдовте во Скадар“, „1912“, како и сликите на Исмаил Кемали, картите на Албанија и Косово и албанскиот орел – симбол што ги обединува Албанците низ целиот свет.