Албанскиот парламент денеска гласаше со мнозинство гласови за разрешување на претседателот на Албанија, Илир Мета.
Оваа постапка го отвори патот за отворање на процесот пред Уставниот суд, кој треба да донесе конечна одлука за судбината на шефот на државата.
На гласањето учествуваа 115 пратеници, бидејќи од 122 пратеници отсуствуваа седуммина, каде 105 гласаа за, седум беа против, а тројца беа воздржани.
Претходно, Парламентот го одобри конечниот извештај на Анкетната комисија со 104 гласа „за“, седум „против“, два воздржани и еден неважечки глас, објавија „Репортери“
Во својот говор за време на презентацијата на наодите од истрагата, шефот на оваа комисија, Алкет Хисени, рече дека претседателот со својата активност извршил неколку сериозни повреди на Уставот, сериозно кршејќи го принципот на сувереност од народот.
Одлуката на Собранието сега мора да ја разгледа Уставниот суд, каде што се потребни најмалку пет гласа за Мета да биде сменет од функцијата шеф на државата.
Претходно денес, албанскиот премиер Еди Рама побара од членовите на парламентот да гласаат за разрешување на претседателот Илир Мета, наведувајќи дека тоа е волја на народот и дека мора да се исполни без одлагање.
Обраќајќи им се на пратениците, тој рече дека Мета ја посрамотил Албанија во односите со САД и меѓународните претставници, пренесува порталот Егзит.
„Мета не може да го има високиот статус што му го даде парламентот. Мета ја заврши работата. Нека гласа парламентот“, рече Рама.
Тој повтори дека Мета го прекршил Уставот и ја предал мисијата на претседателот.