Алијанса за Албанците на прес-конференција денеска обвини дека основни и средни училишта барале пари од ученици и нивните родители за сведителства.
– Само што заврши уште една учебна година и во Тетово повторно се појавија старите шеми на изнудување пари од ученици и родители од основните и средни училишта во Тетово. Многу ученици и родители изминативе денови пријавија дека од нив е побарано пари за сведителствата. Знаејќи дека законот на сила и последното соопштение од Министерството за образование и наука (МОН) велат дека документацијата на завршната година се обезбедува од Бирото за образование, ние како Алијанса јавно прашуваме: Кој ги ограбува тетовските ученици и нивните родители? Од кој центар доаѓаат наредбите за да им се земат пари повторно?Нам ни е јасно дека жртви на овие шеми се и тетовските учители, наставници и професори кои што некој ги става во тешка положба и пред сè бараме разбирање за нив, што и така се прегазени од неисплаќањето за додатната работа за време на пандемијата, изјави на прес-конфренција Музафер Етеми, од тетовскиот огранок на Алијанса за Албанците.
Според него и досега жртви се и учениците и родителите на Тетово, кои по многу трошоци за обезбедување компјутерска опрема, телефони и интернет, сега се принудени да плаќаат и за сведителства. Етеми побара веднаш да се престане со оваа, како што рече, ниска форма на корупција и злоупотреба.
-Ги предупредуваме овие службени лица ако од денес дознаеме за уште еден случај од оваа појава, нема да се двоумиме да ги објавиме со име, презиме и слики сите тие што ги ограбуваат нашите фамилии и вршат притисок врз наставниците. Јавно го повикуваме инспекторатот за образование барем еднаш правилно да ја изврши својата должност и да ги казни тие што немаат милост ни кон децата, рече претставникот на АА.