Амазон стана најголем трговец на мало во Европа за прв пат, надминувајќи ги традиционалните малопродажни гиганти кои доминираа на пазарот со децении. Според најновото рангирање на Топ 20 трговци на мало во Европа и Велика Британија објавено од „Retail Cities“, Амазон го освои првото место со вкупен промет од 179,7 милијарди евра, малку повеќе од германската групација „Schwarz“ („Lidl3 и „Kaufland“), која оствари 179,4 милијарди евра.
Иако разликата помеѓу двата водечки трговци на мало е релативно мала, аналитичарите истакнуваат дека симболиката на оваа промена е многу поголема: за прв пат, дигитална платформа, а не традиционален синџир продавници, е на врвот на европската малопродажба.
Со децении, лидерството во европската малопродажба е поврзано со физичката инфраструктура – бројот на продавници, големината на продажната површина, логистичките мрежи и куповната моќ на големите синџири. Токму ваквите компании, како што се „Lidl“, „Carrefour“ или „Tesco“, ја изградија својата доминација врз широка мрежа на продавници низ целиот континент.
Сепак, „Amazon“ ја изгради својата пазарна позиција врз сосема поинаква основа – дигитална инфраструктура. Неговиот модел на раст се базира на онлајн пазари, огромен интернет сообраќај, анализа на податоци, технолошки решенија и комплексен логистички екосистем што овозможува брза дистрибуција на стоки.
Овој пристап покажува дека е-трговијата повеќе не е само дополнителен канал за продажба, туку станува централна сила која го редефинира европскиот малопродажен пазар.
И покрај растот на дигиталните платформи, европскиот пазар сè уште се карактеризира со силно присуство на големи малопродажни синџири. На листата на водечки компании се „Aldi“, „REWE“, „Lidl“, „Carrefour“, „E.Leclerc“ и „Tesco“, кои продолжуваат да генерираат огромни приходи и имаат значително влијание врз пазарот.
Дваесетте најголеми трговци на мало во Европа вклучуваат и компании како што се „Ahold Delhaize“, „Mercadona“, „Sainsbury’s“, „Apple“, „McDonald’s“, „IKEA“ и „Auchan“, што покажува колку е разновиден и конкурентен малопродажниот сектор.
Експертите веруваат дека подемот на Амазон претставува структурна промена во европската трговија. Додека бројот на продавници и физичката дистрибуција некогаш беа клучни фактори за успех, денес дигиталните платформи, податоците и технологошките решенија играат сè поважна улога.
Оваа промена е особено важна за иднината на европскиот малопродажен сектор, бидејќи укажува на тоа дека компаниите ќе мора да инвестираат сè повеќе во дигитализација, логистика и онлајн продажба за да останат конкурентни.
Затоа аналитичарите веруваат дека влегувањето на Амазон на врвот на европската малопродажба не е само статистичка промена, туку јасен сигнал дека центарот на моќ во малопродажбата се префрла од физичките продавници на дигиталните платформи.