Американскиот сенатор од Републиканската партија Марко Рубио предложи нацрт за нови санкции против руското раководство и лично против рускиот претседател Владимир Путин во случај на ескалација на ситуацијата околу Украина, соопшти партиската прес-служба.
„Предлог-законот предвидува итно воведување силни санкции против Владимир Путин лично“, се вели во соопштението.
Во нацртот Рубио предлага разузнавачката служба на секои 20 дена да го информира американскиот Конгрес за тоа дали Русија го нарушила територијалниот интегритет на Украина. Во случај тоа да се случи, тогаш во следните десет дена ќе бидат воведени санкции против руското раководство, премиерот, министерот за одбрана на Русија и лично против Владимир Путин – нивниот имот и визите ќе бидат блокирани. Истите мерки се предлагаат и против руските бизнисмени кои се под санкции од 2017 година.
Предлогот е да се воведат санкции кога станува збор за сите операции со руски компании во енергетскиот, финансискиот, воздухопловниот и вселенскиот сектор, како и да се применат на давателите на специјализирани услуги за размена на финансиски пораки (на пр. SWIFT). Рубио бара и итно да се воведат санкции против гасоводот „Северен тек 2“.