Бугарскиот амбасадор во заминување, Ангел Ангелов, изјави дека не може да има преговори за прашања кои веќе се договорени, нагласувајќи дека постигнатите договори мора да се почитуваат и исполнуваат. Оваа изјава доаѓа по коментарот на македонскиот министер за надворешни работи и надворешна трговија, Тимчо Муцунски, кој неодамна изрази очекување за брзо формирање на политичка влада во Бугарија, со која би можело да се дискутира на различни нивоа.
„Мојот мандат завршува во петок, така што веќе се сретнав со министерот Муцунски за да се поздравиме. Бугарија сега е во предизборен период, но се надеваме дека по изборите на 27 октомври ќе формираме влада која ќе влезе во интензивен дијалог. Сепак, преговори не може да има за нешто што е веќе договорено, тоа мора да се испочитува и исполни,“ истакна Ангелов по увидот во градежните работи на првиот социјален клуб за адолесценти и возрасни со аутистичен спектар.
Ангелов нагласи дека географијата нема да се менува и дека двете држави ќе останат соседи, додавајќи дека е потребна интензивна комуникација, вклучувајќи ја и работата на историската комисија.
Од друга страна, министерот Муцунски неодамна истакна дека очекува брзо формирање на политичка влада во Бугарија, која ќе овозможи отворање дијалог на повеќе нивоа. Во меѓувреме, премиерот Христијан Мицкоски најави дека ќе има кадровски промени во Заедничката мултидисциплинарна експертска комисија за историски и образовни прашања, поради неисполнување на очекувањата од страна на актуелниот состав на комисијата од македонска страна.