Во позадина на климатските промени, сцените на јужниот пол на Земјата стануваат различни од оние што се интуитивни – и за нас и за неговите жители. Според резултатите од новата анализа, областите на Антарктикот, кои се ослободени од мраз, се „окупираат“ од растителен свет со алармантна брзина.
Пред околу половина век, поточно во 1986 година, растенијата на Антарктикот покриваа нешто помалку од еден квадратен километар, покажуваат сателитски податоци. Малку поновите, од 2021 година, откриваат дека во меѓувреме вегетациската покривка се проширила на речиси 12 km2.
Ширењето на растенијата, главно мов, на Антарктикот е забрзано од 2016 година, посочуваат научниците.
„Во областа сè уште доминираат снег, мраз и камења, а само мали делови се колонизирани од растенија“, нагласува д-р Томас Роланд од Универзитетот во Екстер.
„Но, тие мали закрпи драматично се зголемуваат, што покажува дека дури и оваа огромна и изолирана „дивина“ е под влијание на антропогените климатски промени“.
Во иднина, забележаниот тренд би можел да стане уште побрз. „Како што овие екосистеми стануваат се повоспоставени – и климата продолжува да се загрева – степенот на позеленување веројатно ќе се зголеми“, предупредува д-р Оли Бартлет од Универзитетот во Хертфордшир.
Ова отвора можност за создавање нови предизвици за Јужниот пол на Земјата.
„Почвата на Антарктикот е генерално сиромашна или непостоечка, но ширењето на растенијата ќе додаде органска материја што ќе го олесни формирањето на почвата – потенцијално отворајќи го патот за раст на другите растенија“, објаснува Бартлет. „Ова го зголемува ризикот од внесување на неавтохтони и инвазивни видови од екотуристи, научници или други посетители на континентот.
Во последните шеесет години, Антарктикот се соочува со сериозен пораст на температурата, при што највисоките стапки на затоплување – повисоки од глобалниот просек – се забележани во регионите на Западен Антарктик и на Антарктичкиот Полуостров.
Имајќи го предвид топењето на глечерите и неговиот придонес во порастот на нивото на морето, проценките за влијанието на климатските промени на Антарктикот главно се однесуваат на криосферите (делови од Земјата каде водата е во цврста состојба).
Сепак, како што наведуваат авторите на студијата, од клучно значење е да се разберат биолошките промени на полуостровот, особено затоа што се предвидува трикратно зголемување на областите без мраз.