Американската Федерална трговска комисија побара дополнителни податоци од Activision Blizzard и Microsoft, поврзани со антимонополската ревизија на договорот за спојување меѓу двете компании, рече развивачот на видео-игри.
Во јануари, двете компании постигнаа договор за купување на Activision од софтверскиот гигант за 68,7 милијарди долари. Договорот е дефиниран како најголема зделка во индустријата за игри во нејзината историја досега.
Љубителите на игри од целиот свет беа скршени од веста за договорот. Стравуваат дека ваквото спојување драстично ќе ја намали конкуренцијата во гејмерскиот сектор.
Со овој договор, Microsoft ќе биде на исто ниво со лидерите во индустријата Tencent Holdings и Sony Group. Од своја страна, тие исто така се во процес на откупување на развивачи на игри и технологија за игри. Sony Interactive Entertainment неодамна објави дека одлучил да го купи Bungie Inc. во зделка вредна 3,6 милијарди долари.
Сепак, експертите веруваат дека игрите не се водечки мотив за Microsoft во неговата желба да го купи Activision Blizzard. Наместо тоа, според експертите, технологијата на компанијата му е потребна на Microsoft за да добие предност во светот кој брзо се развива на т.н. искуства од метаверзумот и виртуелната реалност.
Компанијата од Редмонд ќе поднесе документи за одобрување на договорот во 17 јурисдикции, изјави претседателот на Microsoft Бред Смит за новинарите минатиот месец.
За да ги задоволи антимонополските регулатори ширум светот, компанијата во февруари соопшти дека развила нов сет на принципи за својата продавница за апликации. Ова вклучува отворен пристап за програмери кои ги исполнуваат стандардите за приватност и безбедност на компанијата.