Антивладините демонстранти во Унгарија денеска блокираа еден од главните мостови во Будимпешта за време на утринскиот шпиц, што е последен во речиси еднонеделната серија протести против неодамнешните промени во даночниот законик на земјата.
Демонстрантите, главно доставувачи на храна на велосипеди и мотоцикли, го блокираа сообраќајот во двата правци на еден од главните мостови на Дунав во Будимпешта.
Многу од демонстрантите се независни претприемачи погодени од промените усвоени во унгарскиот парламент минатата недела, за кои веруваат дека ќе резултираат со големо зголемување на даноците или губење на работни места.
Бранот демонстрации станува сè повеќе антивладин откако започна на 12 јули. Оттогаш, речиси секоја вечер, илјадници демонстранти излегуваат во центарот на Будимпешта, блокирајќи ги улиците и главните раскрсници барајќи да се повлече законот.
Унгарската владејачка партија Фидес, предводена од националистичкиот премиер Виктор Орбан, го искористи своето мнозинство во парламентот минатата недела за да ги усвои промените на популарниот даночен план познат како КАТА. Планот им овозможува на малите бизниси и хонорарците како што се доставувачите да плаќаат низок паушален данок.
Законот, кој стапува на сила на први септември, ќе влијае на повеќето од околу 450.000 вработени кои го користат планот.
Многу демонстранти го гледаат овој потег како набрзина донесени мерки за штедење за работниците во време кога унгарската валута е на рекордно ниско ниво во однос на доларот и еврото, а земјата се соочува со највисока инфлација во последните 25 години.
Организаторите, спонтано формирана група курири за достава, побараа од опозициските партии да не се појавуваат на демонстрациите. Тие најавија дополнителни протести за утре и во среда, а за подоцна денеска се планирани дополнителни протести во Сегед и Нирегихаза.