Американските големи компании, вклучувајќи ги Apple, Google и Harley-Davidson, вчера престанаа да ги продаваат своите производи во Русија како одговор на руската инвазија на Украина, приклучувајќи се на се поголемиот број компании кои ги презедоа истите чекори, пишува „Хина“.
Apple Inc. објави дека престана да ги продава своите iPhone-и и други производи во Русија, а Harley-Davidson Inc. го прекина својот бизнис и испораките на своите мотоцикли.
Најголемите светски бродски компании, MSC и Maersk, во вторникот го запреа транспортот со контејнери до и од Русија, зголемувајќи ја изолацијата на земјата.
– Длабоко сме загрижени за руската инвазија на Украина и стоиме покрај сите луѓе кои ги трпат последиците од ова насилство – се вели во соопштението на Apple која, меѓу другото, воведе ограничување на системот за плаќање Apple Pay и го оневозможи RT News надвор од Русија.
Apple додаде дека го оневозможи следењето на сообраќајот во живо и инцидентите на мапите на Apple во Украина како безбедносна и превентивна мерка за украинските граѓани.
Потегот на MSC и Maersk значи дека Русија – единаесеттата по големина економија во светот и снабдувач на една шестина од сите стоки – сега е практично отсечена од поголемиот дел од светскиот транспортен капацитет.