Извршниот директор на Apple, Тим Кук, потврди дека компанијата ќе претстави нов производ во среда, 19-ти февруари. Иако не откри за што точно се работи, технолошките портали шпекулираат дека тоа би можел да биде долгоочекуваниот iPhone SE 4, но има и други можности.
„Подгответе се да го запознаете најновиот член на семејството. Среда, 19 февруари. #AppleLaunch“, напиша Кук во објавата на платформата X. Објавата е придружена со кратко видео со сребрено лого на Apple, но без конкретни детали за производот или времето на лансирање.
Според медиумите како Wired и 9to5Mac, можните нови функции вклучуваат нова четврта генерација на iPhone SE, M4 MacBook Air, M3 iPad Air и 11-та генерација на iPad (основен модел).
Корисниците на социјалните мрежи исто така ги споделија своите теории, спомнувајќи се од iPhone SE4, нова верзија на Siri, па дури и iRobot.
Get ready to meet the newest member of the family.
Wednesday, February 19. #AppleLaunch pic.twitter.com/0ML0NfMedu
— Tim Cook (@tim_cook) February 13, 2025
Доаѓа iPhone SE 4?
Најмногу се зборува за доаѓањето на iPhone SE 4. За овој модел се шпекулира повеќе од две години, а се очекува да донесе големи подобрувања во однос на актуелниот најприфатлив iPhone. Според гласините, дизајнот ќе биде инспириран од iPhone 14, со помоќен хардвер и подобрени камери.
Можните спецификации вклучуваат дизајн без копче Home, со засек и Face ID, чип A18 со 8 GB RAM и поддршка за Apple Intelligence. Се очекува и 6,1-инчен OLED дисплеј, задна камера од 48 MP, предна камера од 12 MP и USB-C приклучок наместо претходниот Lightning за полнење.
Според Bloomberg, iPhone SE 4 речиси сигурно ќе биде производот што Apple ќе го претстави утре. Но, додека не пристигне официјална потврда, сите информации треба да се земат со резерва.