За жал, речиси и да не поминува ден без лоши вести од автомобилската индустрија. Германските медиуми јавуваат дека Audi ќе отпушти 1.500 работници.
Се повеќе производители на автомобили се жалат на моменталната ситуација: се помалку купувачи се одлучуваат за ново возило. А од оваа бројка, премал дел од купувачите се одлучуваат за електричен автомобил.
Особено страдаат оние производители на автомобили кои во последните години инвестираа многу во развојот и производството на електрични возила. Многу производители на автомобили создадоа нови погони специјално за производство на електрични автомобили.
Но, се чини дека оваа стратегија сега се покажува како погрешна и ги влошува работите за Audi.
Audi мораше да ги информира своите работници во Брисел за тешката ситуација. Во овој град има фабрика за електрични автомобили каде се произведува само моделот Q8 e-tron.
Проблемот не е само што возилото е постаро, туку и што побарувачката за него е далеку под очекувањата. Бројот на нови нарачки постојано паѓа, поради што фабриката во Брисел е неисплатлива.
Поради недоволниот број добавувачи на терен и високите трошоци за производство на локацијата, раководството размислува да го намали бројот на работници на оваа локација.
Бидејќи фабриката се наоѓа помеѓу станбена зона, автопат и железнички пруги, пренамената на фабриката е тешко да се спроведе. Логистичките трошоци се исто така значителни.
Германските медиуми јавуваат дека 1.500 работници ќе бидат отпуштени од октомври, а уште 1.100 од мај следната година.
Но се уште ништо не е конечно и се бараат општествено прифатливи решенија. Нема да има отпуштања додека не се завршат потребните дискусии и договори меѓу работодавачот и работниците.