Производството на Audi R8 заврши минатата година без наследник на повидок, а иако се очекуваше марката да лансира целосно електричен суперавтомобил, најновите информации сугерираат дека идниот модел сепак ќе биде plug-in хибрид базиран на платформата Lamborghini Temerario.
R8 се произведуваше од 2006 до 2024 година и беа продадени 45.949 примероци. Првата генерација беше механички поврзана со Lamborghini Gallardo, а втората со Huracán. И двајцата користеа атмосферски V10 мотор и беа на врвот на понудата на Audi Sport.
Според Autocar, развојот на третата генерација на R8 напредувала надвор од фазата на изводливост, а можното деби се очекува кон крајот на 2027 година. Спротивно на претходните извештаи за целосно електричен наследник на R8 кој користи компоненти од претстојната SSP платформа на Volkswagen, изданието наведува дека идниот суперавтомобил на Audi ќе биде придвижуван од plug-in хибриден погон.
Наводно ќе го дели електричниот погон со моделот Temerario на Lamborghini, како и алуминиумската шасија и електрониката, што ќе отвори уште едно поглавје во соработката меѓу двете марки.
Temerario е придвижуван од 4,0-литарски V8 твин-турбо мотор во соработка со три електромотори, а вкупната моќност е 920 КС. Покрај тоа, се споменува и помоќна верзија која наводно веќе е во развој и ќе развива повеќе од 1.000 КС. Овие бројки би можеле да го направат новиот R8 најмоќниот и најбрзиот патнички Audi во историјата, бидејќи би го надминал дури и целосно електричниот RS e-tron GT Performance.
За да го разликува суперавтомобилот од моделот Lamborghini, Audi Sport ќе се фокусира на секојдневната употребливост. Во овој контекст, тој би можел да се позиционира како ривал на најдобрите верзии на Porsche 911 и Mercedes-AMG GT. Како и претходните генерации, R8 најверојатно ќе има уникатен внатрешен и надворешен дизајн и би можел да се нуди во Coupe и Spyder верзии.
Третата генерација R8 наводно ќе се произведува во фабриката во Болингер Хофе, исто како и неговите претходници. Audi Sport би можел да произведува и тркачки верзии на новиот R8 и на тој начин да ја продолжи својата традиција во мотоспортот.