Во експлозија пред училиште во главниот град на Авганистан, Кабул, загинаа најмалку 68 лица, соопштија авганистанските власти.
Лекарите се обидуваат да се грижат за најмалку 165 повредени, додека истовремено се врши и идентификација на жртвите, објави Гласот на Америка.
Неколку експлозии се случија во саботата вечерта во областа Даш-е-Барчи, во која живеат шиити од етничкото малцинство Хазар, кое во минатото често беше мета на милитантите на ИСИЛ. Првиот напад се случи поради активирање на автомобил-бомба пред училиштето Сајед ал-Шухад. По една експлозија, учениците истрчаа од училишната зграда – кога следеа уште две детонации.
Според информациите на службените лица, повеќето загинати се ученици на тоа училиште. Еден од очевидците за агенцијата Ројтерс изјави дека станува збор за девојчиња кои се враќале дома после училиште и дека само седум или осум од жртвите не биле ученички.
Авганистанскиот претседател Ашраф Гани ги обвини талибанските бунтовници за нападот. Портпарол на талибанците, од друга страна, го отфрли учеството – велејќи дека групата ги осудува сите напади врз авганистански цивили.
Папата Франциск го осуди нападот во Кабул во неделата – нарекувајќи го нехуман чин.
Антонио Гутереш, генералниот секретар на Обединетите нации, исто така, го осуди нападот и изрази сочувство до семејствата на жртвите и до владата и граѓаните на Авганистан.
Семејствата на жртвите ја обвинија авганистанската влада и западните сили за неуспехот да се запре тековното насилство и војната.
Безбедносните мерки се засилени низ главниот град Кабул – но тамошните власти соопштија дека нема да можат да ги обезбедат сите образовни институции, џамии и други јавни места.
Соединетите држави и меѓународните воени сили започнаа да се повлекуваат на 1 мај, во согласност со договорот постигнат од САД со талибанците во 2020 година.
Пред повлекувањето, американскиот претседател Џо Бајден рече дека американските трупи од Авганистан ќе бидат повлечени до 11 септември 2021 година, на дваесетгодишнината од нападот врз Светскиот трговски центар во Њујорк и зградата на Пентагон во Вашингтон – со што беше иницирана интервенција на САД во Авганистан.
Талибанците управуваа со Авганистан од 1996 до 2001 година, кога беа соборени од меѓународната воена коалиција предводена од САД. Потоа започна нивниот бунт и борбите што ги водеа со силите на меѓународната коалиција.
Причината за сојузничката интервенција беше прибежиштето обезбедено од талибанците и Авганистан на водачите на Ал Каеда кои беа одговорни за терористичките напади во 2001 година.
Според извештајот на Обединетите нации, има најмалку 500 борци на Ал Каеда на територијата на Авганистан со кои талибанците одржуваат блиски врски, што, од друга страна, талибанците го негираат.