Талибанците запреле авганистански вработен во ОН, кој се движел кон аеродромот во Кабул, го пребарале неговото возило, ја нашле неговата идентификација на ОН и потоа го претепале, пренесува Ројтерс.
Во меѓувреме, тројца мажи ја посетиле резиденцијата на друг вработен во ОН, кој бил на работа и го прашале неговиот син каде е неговиот татко, а кога тој одговорил дека неговиот татко работи, тие го обвиниле дека лаже.
Ова се само два примери за десетици инциденти снимени од 10 август, непосредно пред талибанците да ја преземат контролата врз Кабул, кои се наведени во внатрешниот безбедносен документ на ОН, кој беше прегледан и од новинар на Ројтерс.
Во документот се наведува дека од 10 август, персоналот на ОН е изложен на постојани закани, грабежи на канцеларии и физичко малтретирање.
Иако Талибанците се обидуваат да ги убедат Авганистанците и западните сили дека ќе ги почитуваат човековите права, извештаите за одмазда ја поткопаа нивната доверба, иако претставниците на исламистичкото движење ветуваат дека ќе ги истражат сите пријавени злоупотреби.
Талибанците ги охрабруваат хуманитарните организации да продолжат со својата работа и велат дека помошта е добредојдена се додека не се користи како средство за политичко влијание врз Авганистан.
Фото: Xinhua