„Гордa сум што Австралија сега штити повеќе океани од која било друга земја во светот“.
Ова го изјави министерката за животна средина Тања Плибершек во врска со проширувањето на морските паркови што беше потпишано минатата недела. Благодарение на амбициозната владина иницијатива, спроведена во соработка со научниците, заштитеното подрачје се зголеми на повеќе од половина од океаните во Австралија (52%).
Но, сепак далеку од глобално лидерство… На овој начин, Австралија всушност ја надмина целта за заштита на 30% од океаните кон кои целеше како дел од Договорот за природата на Обединетите нации.
Со новото проширување на површината на заштитените океани, два оддалечени и изолирани морски резервати – на островите Херд и Мекдоналд – се зголемени за четири пати, односно за 310 илјади квадратни километри.
„Од Големиот корален гребен до дивината под Антарктикот… Неколку места на планетата можат да се опишат како навистина недопрена дивина“, рече Плибершек. „Островот Херд и Островите Мекдоналд се такви места“.
Тие се карактеризираат со глечери и мочуришта, а згора на тоа, овие острови во Индискиот Океан се дом на единствените два активни вулкани во Австралија. Островите Херд и Мекдоналд се ненаселени со луѓе, но тие се дом на разновидна популација на пингвини, фоки и албатроси. Меѓу другите, делфини и китови пливаат во околните води.
За да се официјализира одлуката, министерката ќе му ги предложи ажурираниот дизајн и границите на морските паркови на генералниот гувернер на Австралија за објавување, се вели во соопштението.
Конференцијата на Обединетите нации за биолошка разновидност започнува во градот Кали, Колумбија на 21 октомври, а австралискиот исчекор во заштитата на океаните е позитивен пример за многу учесници.
„Ова не е само голема победа за животната средина во Австралија, ова е голема победа за животната средина во светот“, заклучи Тања Плибершек.