Австрија ја зголемува безбедноста во црквите поради нападот во Виена

Австрија воведува строги безбедносни мерки во црквите од страв од повторување на нападот на почетокот на овој месец кога исламист уби четири лица во Виена, и за кој се претпоставува дека му биле цел места за богослужба, рече во четвртокот министерот за внатрешни работи.

Дваесетгодишникот, роден и израснат во Виена, беше убиен откако пукаше кон минувачите и гостите на баровите на 2 ноември. Австрија истражува 21 лице, вклучително и десет приведени, во врска со нападот, пренесува Хина.

„Врз основа на истрагата, не може да се исклучи дека напаѓачот планирал да напаѓа луѓе во црквите“, рече министерот Карл Нехамер.

„Затоа, од денес, ќе ја зајакнеме безбедноста на црковните згради“, додаде тој.