BMW Group и Universitätsmedizin Berlin (Charité) почнаа да ја истражуваат можноста за медицинска технологија во автомобилите. Целта на оваа соработка е развој на методи за предвидување на кардиоваскуларните ризици кај возачите.
BMW соопшти дека бројните сензори во модерните автомобили можат континуирано да собираат и анализираат податоци за состојбата на возачите и патниците.
Професорот Хејо К. Кромер, директор на Универзитетската болница Charité, смета дека тоа значително ќе ја подобри превенцијата и избегнувањето на итни случаи при возење на среден рок.
Како дел од меморандумот за соработка помеѓу BMW Group и Charité, тим од инженери и медицински експерти ќе работи во повеќе области.
Меѓу овие области се развојот на „паметни“ системи за помош на возачот, создавање архитектура која ги исполнува барањата за заштита на личните податоци, проучување на здравствените ефекти од параметрите во автомобилот и развој на превентивни мерки за подобрување на здравјето на возачот, и партнерите исто така ќе ја истражуваат употребата на вештачка интелигенција во комбинација со постоечки и нови сензори за возила.