Американскиот претседател Џозеф Бајден рече дека од авганистанскиот народ зависи како ќе ја води својата земја, најавувајќи дека американската воена мисија во Авганистан ќе заврши на 31 август, и покрај новата загриженост за можноста за граѓанска војна.
„Не отидовме во Авганистан за да градиме држава“, рече Бајден, пренесе Ројтерс.
„Ексклузивно право и одговорност на авганистанскиот народ е да одлучува за својата иднина и како сака да управува со својата земја“, рече тој.
Бајден посочи дека Соединетите Американски држави планираат да иселат илјадници авганистански преведувачи од земјата, очекувајќи крај на американската воена мисија во таа земја на 31 август.
Во меѓувреме, талибанските борци денеска ја презедоа контролата врз клучниот округ во западен Авганистан кој го вклучува главниот граничен премин со Иран, соопштија авганистанските безбедносни власти, додека исламистичките бунтовници продолжија со брзиот воен напредок низ целата земја. Според портпаролот на Пентагон, Џон Кирби, талибанците окупирале десетина окружни центри во Авганистан.
„Тие окупираа десетина окружни центри, тоа е точно. И ние веруваме дека тие сакаат да ги загрозат и покраинските центри“, истакна Кирби.