Белоруските власти вчера го прогласија белорускиот сервис на германскиот државен медиум „Дојче веле“ за екстремистичка организација и ги забранија неговите активности во земјата.
Најавата значи дека секој што произведува содржина за белорускиот сервис на „Дојче веле“ потенцијално може да се соочи со затворска казна до седум години. Секој што чита и реемитува написи на „Дојче веле“ може да биде прогласен за виновен за прекршок или кривично дело.
Генералниот директор на „Дојче веле“, Петер Лимбург, ја критикуваше одлуката, оценувајќи дека обвинувањата против медиумите се неосновани и не ја одразуваат вистинската природа на работата на белорускиот сервис.
Белоруските власти веќе прогласија 199 организации за екстремисти и ја користат таа ознака за да го задушат несогласувањето во земјата. На списокот се белорускиот сервис на „Радио Слободна Европа“ и независната белоруска телевизија „Белса“т, која емитува програма на белоруски од полскиот главен град Варшава.
„Ситуацијата со слободата на говор во Белорусија е најлоша во Европа“, рече Андреј Бастунец, шеф на белоруското здружение на новинари, додавајќи дека Белорусија е како „европска Северна Кореја“.
Белорусија беше опфатена со масовни протести во 2020 година по изборите на кои авторитарниот претседател Александар Лукашенко изјави дека го освои шестиот мандат. Западот и опозицијата тврдеа дека изборите се наместени.
Како одговор на тие протести, властите уапсија повеќе од 35.000 луѓе, а некои од нив беа брутално претепани, според проценките на организациите за одбрана на човековите права.
Многу истакнати опозиционери беа уапсени и осудени на долги затворски казни, додека други избегаа во странство.
Белорускиот сервис на „Дојче веле“ е со седиште во Бон, а медиумската куќа е финансирана од германската влада.
Според Белоруското здружение на новинари, во моментов во Белорусија се наоѓаат 36 новинари во затвор.