Вооружените сили на Белорусија денеска објавија дека Белорусија, како одговор на зголемената закана од САД и нејзините сојузници, ќе распореди трупи за специјални операции во три области во близина на украинската граница, пренесува Ројтерс.
Откако белорускиот претседател Александар Лукашенко изјави денеска дека Русија се согласила да и помогне на Белорусија да произведе ракети, белоруските вооружени сили соопштија дека Белорусија ќе распореди свои „трупи за специјални операции“ во три области во близина на јужната граница со Украина, бидејќи, како што велат, Западот распоредува се повеќе нејзини војници на белоруските граници.
„САД и нивните сојузници продолжуваат да го зајакнуваат своето воено присуство на државните граници на Република Белорусија. Воспоставената група е повеќе од двојно зголемена во изминатите шест месеци по квантитет и квалитет“, изјави денеска началникот на Генералштабот Виктор Гулевич, додавајќи дека Белорусија распоредува и противвоздушни, артилериски и ракетни единици за вежби на Запад.
Зголеменото воено присуство на западните сојузници, вели началникот, „сведочи за зголемената закана за Република Белорусија“.
Белорусија со месеци се жали на акумулација на војници на НАТО во близина на белоруските граници со Полска, Литванија и Латвија, потсетува Ројтерс.
Што се однесува до руското оружје во белоруската армија, Лукашенко денеска изјави дека Русија се согласила да му помогне на Минск да произведе ракети Искандер, кои Русија ги користи во Украина, и дека сака Белорусија да продолжи да ги користи руските ракетни системи С-400 и С-300. Тој тогаш рече дека белоруската армија е подготвена за борба и дека во случај на надворешна агресија ќе може да „нанесе неприфатлива штета на непријателот“.
„Ние сме реалисти, разбираме дека нема да можеме да го победиме НАТО. Сепак, имаме оружје за да нанесеме штета, особено на териториите од кои ќе бидеме нападнати“, изјави денеска белорускиот претседател Александар Лукашенко.