Bentley Blower е легенда и икона на автомобилската индустрија, а сега се враќа по речиси 100 години од своето деби. Сепак, не треба да претеруваме со очекувањата, бидејќи нема да биде „ѕвер“ со 4,5-литарски мотор.
Blower Jnr ќе биде покомпактен автомобил кој ќе му оддаде почит на оригиналот. Иако го промовира Bentley, производството всушност ќе го врши британската компанија Hedley Studios, која е попозната по создавањето минијатурни верзии на класични автомобили. Ќе бидат произведени само 349 примероци.
Порано позната како „The Little Car Company“, Hedley Studios не е нова во „бизнисот со мали автомобили“. Досега, произведуваше мини верзии на некои култни автомобили, вклучувајќи го Bugatti Baby II и Ferrari Testa Rossa J.
Blower Jnr оди чекор понатаму, бидејќи ќе биде 85 проценти од големината на Bentley Blower од 1929 година, и за разлика од претходните модели на Hedley, ќе биде целосно легален за возење на патишта.
Оригиналниот Blower имал 4,5-литарски мотор со компресор, додека Blower Jnr ќе биде напојуван од електричен мотор кој испорачува нешто повеќе од 20 коњски сили. Максималната брзина во Велика Британија и Европската Унија е ограничена на 74 км/ч, а во САД на 42 км/ч. Со едно полнење, автомобилот ќе има опсег до 65 милји.
Производството на Blower Jnr е веќе во тек, а првите испораки се очекуваат оваа година. Купувачите ќе можат да прават разни модификации за да го издвојат својот примерок од останатите.
Hedley брилијантно го реплицираше дизајнот на оригиналот, со обоена челична рамка слична на оригиналот, и вклучувајќи лиснати пружини и амортизери соодветни на тој период, како и рачно изработена алуминиумска хауба. Другите компоненти се направени од јаглеродни влакна, но внатрешноста содржи импрегнирана ткаенина слична на оригиналот од 1929 година.
Почетната цена на моделот Blower Jnr е околу 90.000 фунти, односно околу 100.000 евра.